Jahon iqtisodiyoti va diplomatiya universitetida Koreya Respublikasining O‘zbekistondagi Favqulodda va Muxtor Elchisi Li Uk Xyonni universitetning faxriy doktori unvoni bilan taqdirlash marosimi bo‘lib o‘tdi. Bu haqda “Gazeta.uz” xabar bermoqda.
Marosimda Li Uk Xyon 2013-yil iyulida Toshkentda elchilik faoliyatini boshlagandan beri ikki mamlakat o‘rtasidagi strategik sherikchilik munosabatlari hamda turli yo‘nalishlardagi o‘zaro hamkorlik jadal rivojlanib borgani e’tirof etildi. Jumladan, 2014-yil iyunida Toshkentda va 2015-yil may oyida Seulda ikki tomonlama oliy darajadagi sammitlar bo‘lib o‘tgani, ular natijasiga ko‘ra jami 9,5 milliard dollarga teng kelishuvlar imzolangani qayd etildi.
Koreya xalqaro hamkorlik agentligining (KOICA) O‘zbekistondagi faoliyati kengayib borayotgani, Toshkentda Inha universiteti filiali ochilgani, Jahon iqtisodiyoti va diplomatiya universitetida koreys tili markazi, Nizomiy nomli Toshkent davlat universtiteti va Toshkent davlat sharqshunoslik institutida elektron kutubxonalar, Samarqandda professional o‘qitish markazi faoliyat yuritayotgani, Qo‘qon va Shahrisabzda shunday markazlarni tashkil etish yuzasidan kelishuvga erishilgani ta’kidlab o‘tildi.
O‘zbekistondagi diplomatik missiyasini yakunlayotgan elchi “O‘zbekiston rahbariyati va universitet menga nufuzli oliy o‘quv yurti faxriy doktorligini taqdim etganidan faxrlanaman, bu ikki tomonlama munosabatlarning yuqori darajasidan dalolat beradi”, deya o‘z minnatdorligini izhor etdi.
Izoh (0)