Жаҳон иқтисодиёти ва дипломатия университетида Корея Республикасининг Ўзбекистондаги Фавқулодда ва Мухтор Элчиси Ли Ук Хённи университетнинг фахрий доктори унвони билан тақдирлаш маросими бўлиб ўтди. Бу ҳақда «Газета.uz» хабар бермоқда.
Маросимда Ли Ук Хён 2013 йил июлида Тошкентда элчилик фаолиятини бошлагандан бери икки мамлакат ўртасидаги стратегик шерикчилик муносабатлари ҳамда турли йўналишлардаги ўзаро ҳамкорлик жадал ривожланиб боргани эътироф этилди. Жумладан, 2014 йил июнида Тошкентда ва 2015 йил май ойида Сеулда икки томонлама олий даражадаги саммитлар бўлиб ўтгани, улар натижасига кўра жами 9,5 миллиард долларга тенг келишувлар имзолангани қайд этилди.
Корея халқаро ҳамкорлик агентлигининг (KOICA) Ўзбекистондаги фаолияти кенгайиб бораётгани, Тошкентда Инҳа университети филиали очилгани, Жаҳон иқтисодиёти ва дипломатия университетида корейс тили маркази, Низомий номли Тошкент давлат универститети ва Тошкент давлат шарқшунослик институтида электрон кутубхоналар, Самарқандда профессионал ўқитиш маркази фаолият юритаётгани, Қўқон ва Шаҳрисабзда шундай марказларни ташкил этиш юзасидан келишувга эришилгани таъкидлаб ўтилди.
Ўзбекистондаги дипломатик миссиясини якунлаётган элчи «Ўзбекистон раҳбарияти ва университет менга нуфузли олий ўқув юрти фахрий докторлигини тақдим этганидан фахрланаман, бу икки томонлама муносабатларнинг юқори даражасидан далолат беради», дея ўз миннатдорлигини изҳор этди.
Изоҳ (0)