AQSh davlat kotibi Jon Kerri kelasi hafta Rossiya prezidenti Vladimir Putin va tashqi ishlar vaziri Sergey Lavrov bilan uchrashish uchun Moskvaga tashrif buyuradi. Bu haqda uning o‘zi 15-mart, seshanba kuni ma’lum qildi, deb yozadi “RBK”.
Uning aniqlik kiritishicha, tashrifdan ko‘zlangan maqsad — Suriyadagi nizolarni tartibga solish bo‘yicha bundan keyingi qadamlarni muhokama qilish.
“Bugun, ushbu dahshatli urush boshlanganiga besh yil to‘lganidan keyin biz unga nuqta qo‘yish uchun shu yillardagi eng yaxshi imkoniyatni qo‘lga kiritdik”, — deya ta’kidladi u.
Kerrining fikricha, jangovar harakatlarning to‘xtatilishi, Rossiya o‘z qo‘shinlarini chiqarib ketish haqida e’lon qilishi, shuningdek, shu haftada Jenevada siyosiy muzokaralarning o‘tkazilishi orqali Suriyadagi vaziyatning tartibga solinishi bo‘yicha jarayonda “juda muhim bosqichga erishilgan”.
Izoh (0)