Namanganda yangi yo‘l belgisi — “Obodonlashtirish ishlari”

Facebook’dagi “Voditeli Tashkenta” guruhida Namangandagi obodonlashtirish boshqarmasi xodimlarining ish jarayoni aks etgan fotosurat e’lon qilindi.

Fotosuratdagi e’tiborga molik eng asosiy jihat — boshqarma xodimlarining bevosita ish joyi oldiga o‘rnatilgan yo‘l belgisidir: unda qo‘liga, katta ehtimol bilan, supurgi ushlagan ayol tasvirlangan.

Fotoxabar ostida fikr bildirgan foydalanuvchilardan biri Farg‘onadagi obodonlashtirish xodimlari ham xuddi shunday belgidan foydalanishini yozib qoldirgan.

Ma’lumot uchun, O‘zbekistonda amalda bo‘lgan Yo‘l harakati qoidalarida bunday belgi nazarda tutilmagan. Ko‘chalardagi ta’mirlash, tozalash va obodonlashtirish ishlari vaqtlarida mas’ul xizmatlarning xodimlari, odatda, “Ta’mirlash ishlari” yo‘l belgisidan foydalanadi.

Xususan, Yo‘l harakati qoidalarining “Ogohlantiruvchi belgilar” bo‘limida, agar qatnov qismida qisqa muddatli yo‘l ishlari olib borilayotgan bo‘lsa, ish bajarilayotgan joyga 10—15 metr masofa yetmasdan 1.23 — “Ta’mirlash ishlari” belgisi o‘rnatilishi mumkinligi qayd etilgan.