«Туркистон» саройида 8 март – Халқаро хотин-қизлар куни муносабати билан тантанали тадбир бўлиб ўтди, дея хабар беради ЎзА.
5 март куни хотин-қизлар ташкилотлари вакиллари, турли соҳаларида самарали меҳнат қилиб келаётган бир гуруҳ аёллар Мустақиллик майдонига ташриф буюрди. Мустақиллик ва эзгулик монументи пойига гуллар қўйди.
Байрам иштирокчилари Республика ихтисослаштирилган сув спортини ривожлантириш марказида бўлди. Алишер Навоий номидаги Ўзбекистон Давлат академик катта театрида «Садоқат» спектаклини томоша қилди.
Шу куни «Туркистон» саройида Халқаро хотин-қизлар куни муносабати билан тантанали тадбир бўлди. Унда турли соҳаларда самарали меҳнат қилаётган хотин-қизлар, фахрийлар, турли вазирлик ва идоралар, жамоат ташкилотларининг вакиллари, Зулфия номидаги Давлат мукофоти совриндорлари иштирок этди.
Тантанали йиғилишни Тошкент шаҳар ҳокими Р. Усмонов очди.
Президент Ислом Каримовнинг Ўзбекистон хотин-қизларига байрам табригини Президентнинг Давлат маслаҳатчиси Х. Султонов ўқиб эшиттирди.
Ўзбекистон Республикаси Бош вазирининг ўринбосари, Республика Хотин-қизлар қўмитаси раиси Э.Боситхонова хотин-қизларнинг жамиятдаги мавқеини юксалтириш, ҳуқуқ ва манфаатларини таъминлаш, саломатлигини мустаҳкамлаш борасида амалга оширилаётган ишларнинг самаралари ҳақида сўзлади.
Тадбирда Президент Ислом Каримов қарорига мувофиқ Зулфия номидаги Давлат мукофоти билан тақдирланган 14 нафар қизга мукофотлар тантанали равишда топширилди.
Ўзбекистон халқ артисти Мирза Азизов, Ангрен шаҳридаги Мирзо Улуғбек номидаги маҳалла фуқаролар йиғинининг диний маърифат ва маънавий-ахлоқий тарбия масалалари бўйича маслаҳатчиси Раъно Ҳайитқулова хотин-қизларни байрам билан табриклади.
Тадбир санъат усталари ва ёш ижрочиларнинг байрам концерти билан якунланди.
Тантанали тадбирда Ўзбекистон Республикаси Олий Мажлиси Сенати Раиси Н.Йўлдошев, Олий Мажлис Қонунчилик палатаси Спикери Н.Исмоилов, Ўзбекистон Республикаси Бош вазири Ш.Мирзиёев иштирок этди.
Изоҳ (0)