Kecha, 26-fevral oqshomida Toshkentdagi “O‘zbekiston” sport saroyida Butunjahon boks seriyasi (WSB)ning VI mavsumidan o‘rin olgan navbatdagi janglar o‘tkazildi. Unda Uzbek Tigers jamoasi Puerto-Rikoning Puerto Rico Hurricanes bokschilariga qarshi ringga ko‘tarildi, deb xabar beradi “Olamsport”.
Kecha, 26-fevral kuni bo‘lib o‘tgan janglarda ringga chiqqan o‘zbekistonlik bokschilar Abror Qodirov, Elnur Abduraimov, Doston Turdiyev, Shuhrat Abdullayev hamda Sardor Abdullayev mos ravishda raqiblari Keyber Avilla, Stiven Ruidiaz, Samuel Kedeno, Xuan Karillo va Valavikus Mantasni mag‘lubiyatga uchratdi. Umumiy natijaga ko‘ra, Uzbek Tigers 5:0 hisobida g‘alaba qozondi.
Qayd etish joiz, mavsumning dastlabki uchrashuvida O‘zbekiston jamoasi San-Xose shahrida o‘tkazilgan ilk to‘qnashuvida Puerto-Riko bokschilariga qarshi ringga ko‘tarilib, o‘shanda ham 5:0 hisobida g‘alaba qozongandi.
“D” guruhidan o‘rin olgan Uzbek Tigers jamoasi Toshkentdagi navbatdagi uchrashuvini bugun, 27-fevral kuni Qozog‘istonning Astana Arlans jamoasiga qarshi o‘tkazadi.
Shuningdek, 26-fevral kuni APB yo‘nalishida ham uchta jang o‘tkazildi. Ushbu janglarda O‘zbeksiton vakillari Jasurbek Latipov, Dilshod Mahmudov va Isroil Madrimov mos ravishda mo‘g‘ulistonlik Murdum Engene Gandulam, ispaniyalik Yuba Ndiaye Sissoxo va hindistonlik Krishan Vikash Yadavdan ustun keldi.
Izoh (0)