O‘zbekistonlik bokschi Mahmud G‘oipov Sofiyadagi “Stranja” xalqaro turnirining finaliga yo‘l oldi

Bolgariya poytaxti Sofiya shahrida boks bo‘yicha an’anaviy “Stranja” xalqaro turniri yakuniga yetib bormoqda, deb xabar beradi “Sports.uz”.

O‘z tarixida 67-marotaba o‘tkazilayotgan musobaqada dunyoning 40 dan ziyod davlatidan 300 nafarga yaqin bokschilar ishtirok etyapti.

Kecha, 26-fevral, juma kuni -69 kilogramm vazn toifasida o‘tkazilgan yarim finalda o‘zbekistonlik bokschi Mahmud G‘oipov xitoylik Lui Veyga qarshi ringga ko‘tarildi. Ushbu bellashuvda O‘zbekiston vakili 3:0 hisobida raqibidan ustun kelib, final yo‘llanmasini qo‘lga kiritdi.

Yana bir yarim final bellashuvida o‘zbekistonlik Sardorbek Begaliyev (-91 kg) rossiyalik Yevgeniy Tishenkoga imkoniyatni boy berib qo‘ydi va turnirning bronza medaliga sazovor bo‘ldi.

Bugun, 27 fevral, shanba kuni “Stranja” xalqaro turnirining final janglari o‘tkaziladi.