O‘zbekistondagi Gripp markazi rahbari: “O‘z-o‘zini davolash — xavfli”

Ushbu mavsumda keng tarqalgan A(H1N1)pdm09 grippi virusi OAVlar tomonidan yanglish ravishda “cho‘chqa grippi” deb atalmoqda. Bu haqda O‘zbekiston Sog‘liqni saqlash vazirligi huzuridagi Milliy gripp markazi rahbari Ravshan Rahimov maqolasida aytiladi, deb yozadi “Gazeta.uz”.

“Aslida, bu 2009-yilda paydo bo‘lib, gripp pandemiyasini yuzaga keltirgan A turidagi gripp virusidir. U haqiqatan ham cho‘chqa organizmida shakllangan. Ushbu gripp bilan kasallangan ilk odamlar ulardan yuqtirgan, grippning nomi shundan kelib chiqqan. Biroq keyingi yuqtirish holatlari xasta kishilardan o‘tgan”, — deya ta’kidladi Rahimov.

“Gripp va ko‘plab o‘tkir respiratorli infeksiyalar belgilari o‘xshash, kasallik odatda tana harorati ko‘tarilishi, lohaslik, yuqori nafas yo‘llari shilliq qavatining shamollashi va qichishishi, yo‘tal bilan boshlanadi”, — deyiladi maqolada.

Rahimovning qayd etishicha, o‘z-o‘ziga tashxis qo‘yish va o‘z-o‘zini davolash xavflidir: “Gripp, ko‘pchilik o‘tkir respiratorli infeksiyalar kabi virusli infeksiya bo‘lib, unga antibiotiklar umuman ta’sir qilmaydi. Agar virusli infeksiyaga bakteriyali infeksiya qo‘shilgan bo‘lsagina, ular yozib beriladi”.

Kasallanib qolsangiz, uydan chiqmaslik kerak, shifokorni chaqirish va yotib davolanish rejimiga rioya qilish zarur. Bemor oila a’zolaridan alohida joylashtirilishi lozim. Ahvoli og‘irlashgudek bo‘lsa, tez yordam chaqirish kerak.