Ушбу мавсумда кенг тарқалган A(H1N1)pdm09 гриппи вируси ОАВлар томонидан янглиш равишда «чўчқа гриппи» деб аталмоқда. Бу ҳақда Ўзбекистон Соғлиқни сақлаш вазирлиги ҳузуридаги Миллий грипп маркази раҳбари Равшан Раҳимов мақоласида айтилади, деб ёзади «Газета.uz».
«Аслида, бу 2009 йилда пайдо бўлиб, грипп пандемиясини юзага келтирган А туридаги грипп вирусидир. У ҳақиқатан ҳам чўчқа организмида шаклланган. Ушбу грипп билан касалланган илк одамлар улардан юқтирган, гриппнинг номи шундан келиб чиққан. Бироқ кейинги юқтириш ҳолатлари хаста кишилардан ўтган», — дея таъкидлади Раҳимов.
«Грипп ва кўплаб ўткир респираторли инфекциялар белгилари ўхшаш, касаллик одатда тана ҳарорати кўтарилиши, лоҳаслик, юқори нафас йўллари шиллиқ қаватининг шамоллаши ва қичишиши, йўтал билан бошланади», — дейилади мақолада.
Раҳимовнинг қайд этишича, ўз-ўзига ташхис қўйиш ва ўз-ўзини даволаш хавфлидир: «Грипп, кўпчилик ўткир респираторли инфекциялар каби вирусли инфекция бўлиб, унга антибиотиклар умуман таъсир қилмайди. Агар вирусли инфекцияга бактерияли инфекция қўшилган бўлсагина, улар ёзиб берилади».
Касалланиб қолсангиз, уйдан чиқмаслик керак, шифокорни чақириш ва ётиб даволаниш режимига риоя қилиш зарур. Бемор оила аъзоларидан алоҳида жойлаштирилиши лозим. Аҳволи оғирлашгудек бўлса, тез ёрдам чақириш керак.
Изоҳ (0)