2016-yilning yanvar oyida Toshkent shahridagi xonadonlar ijarasining o‘rtacha narxlari 2015-yilning dekabr oyi bilan solishtirganda 12% ga arzonlashdi va 1 kvadrat metr uchun ijara qiymati 6,1 shartli birlikni tashkil eta boshladi.
Yanvar oyida kvartiralarning ijara haqi shaharning ko‘pgina tumanlarida arzonlashdi. Xususan, Mirzo Ulug‘bek va Yashnobod tumanlarida o‘rtacha ijara haqi 18% ga kamayib 5,1 va 4,3 shartli birlikni tashkil etdi.
Toshkent shahri bo‘yicha ijaraga beriladigan eng qimmat xonadonlar Mirobod tumanida joylashgan bo‘lib, ushbu hududda 1 kv.m uchun ijara narxi yanvar oyida 4% ga kamayib, 8,0 sh.b. ni tashkil etdi. Ijaraga beriladigan eng arzon kvartiralar esa Toshkent shahrining Sirg‘ali tumanida joylashgan bo‘lib, mazkur hududda kvartiralar ijarasining o‘rtacha 1 kv.m 3,3 sh.b. ni tashkil etmoqda.
Shuni ta’kidlash joizki, tumanlar ichidagi narxlarda ham ancha sezilarli tafovutlar mavjud. Xususan, ijaraga berish uchun taklif etilayotgan xonadonlarning eng qimmatlari Toshkent shahrining T.Shevchenko va Nukus ko‘chalarida hamda Markaziy univermag va Oybek metrosi atroflarida joylashgan.
Shuningdek, ijaraga berilayotgan xonadonlar soni bo‘yicha Mirobod va Mirzo Ulug‘bek tumanlari yetakchilik qilmoqda. Mazkur tumanlar Toshkent shahridagi jami ijaraga berilayotgan xonadonlar bo‘yicha taklifning 58 foizini o‘zida jamlagan. O‘z navbatida, ijaraga berilayotgan xonadonlarning keyingi o‘rinlari Yunosobod va Yakkasaroy tumanlariga to‘g‘ri keladi va ular jami taklifning 14 va 9 foizini tashkil qilmoqda.
Talab nuqtai nazarida, Toshkent shahrida ikki va uch xonali kvartiralarga qiziqish katta bo‘lib, ular jami talabning 60 foizini tashkil etadi.
Toshkent shahrida ijaraga berilayotgan xonadonlarning o‘rtacha narxi: 1 xonali kvartiralar uchun 240 sh.b., 2 xonalilari uchun 330 sh.b. ni va 3 xonalilari uchun 528 sh.b. ni tashkil etdi.
Ba’zi tumanlar bo‘yicha kvartiralar ijara narxlari (sh.b. da ko‘rsatilgan)
| 1 xona | 2 xona | 3 xona | |
|---|---|---|---|
| Mirobod | 302 | 466 | 782 |
| Yakkasaroy | 251 | 373 | 621 |
| Shayxontohur | 200 | 286 | 544 |
| Yunusobod | 212 | 284 | 461 |
| Mirzo Ulug‘bek | 246 | 259 | 375 |
| Chilonzor | 178 | 260 | 421 |
| Yashnobod | 156 | 220 | 303 |
| Toshkent shahri bo‘yicha o‘rtacha narx | 240 | 330 | 528 |
Ijaraga qo‘yilgan kvartiralar bo‘yicha to‘laroq ma’lumotga ega bo‘lmoqchi bo‘lsangiz http://uybor.uz/ru/arenda ga kirishingiz mumkin.
Ushbu ma’lumotlar “UyBor.uz” portalida ijaraga berilayotgan takliflarning o‘rtacha narx ko‘rsatkichlari asosida tayyorlangan. “Uybor.uz” va / yoki “Daryo” nashri ma’muriyati ushbu hisobot asosida qabul qilingan qarorlar uchun javobgar emas. Ko‘chmas mulk ijarasi masalasida professional maslahatga ega bo‘lish uchun Ko‘chmas mulk agentliklariga murojaat eting.
Reklama huquqi asosida
Izoh (0)