AQShdagi prezidentlik kampaniyasi ilk kokuslarida Hillari Klinton va senator Ted Kruz g‘olib bo‘ldi

Texasdan senator Ted Kruz Respublikachilar partiyasining Ayova shtatidagi kokuslari (siyosiy partiya a’zolarining yopiq majlisi)da g‘olib chiqdi, deb yozadi “Vedomosti”.

Ayovada 1-fevral kuni ham Respublikachilar, ham Demokratlar partiyasi uchun nomzodlarni dastlabki ilgari surish bo‘yicha prezidentlik kampaniyasi davomidagi birinchi partiya ichki majlislari bo‘lib o‘tdi. Respublikachilar ovozlarining 99 foizi hisoblab chiqilganidan so‘ng Kruz qariyb 28%, Donald Tramp 24%, Floridadan senator Marko Rubio 23% ovoz to‘plagani ma’lum bo‘ldi.

Demokratik partiya kokuslarida esa AQSh sobiq davlat kotibi Hillari Klinton 49,9%, Vermontdan senator Berni Sanders 49,6% ovoz yig‘di. Demokratlardan uchinchi nomzod, Merilend sobiq gubernatori Martin O’Melli kurashdan chiqishini e’lon qildi.