Qashqadaryoning Kitob tumanida madaniyat va aholi dam olish markazi foydalanishga topshirildi. Bu haqda O‘zbekiston Respublikasi Madaniyat va sport ishlari vazirligi Respublika xalq ijodiyoti va madaniy-ma’rifiy ishlar ilmiy-metodik markazi matbuot xizmati “Daryo”ga xabar berdi.
I tipdagi Markazni ta’mirlash hamda jihozlash uchun mahalliy budjet mablag‘laridan 585 million so‘m sarflandi. 400 o‘rinli tomosha zaliga ega va 20 xonadan iborat mazkur madaniyat va aholi dam olish markazida 13 dan ortiq rubob, doira, dutor, tikuvchilik, gimnastika, kurash, shaxmat-shashka, karate kabi to‘garaklari bilan olti mingdan ortiq yoshlarga xizmat qiladi.
Madaniyat va aholi dam olish markazining tantanali ochilish marosimini O‘zbekiston Respublikasi madaniyat va sport ishlari vaziri Bahodir Ahmedov tabrik so‘zi bilan boshlab berdi.
Tadbirning badiiy qismida “Nihol” mukofoti sovrindorlari Oybek va Nigora, xonandalar Jasur Umirov, Sardor Mamadaliyev hamda viloyatning taniqli san’atkorlari — O‘zbekistonda xizmat ko‘rsatgan artist Oygul Halilova, “Shuhrat” medali sohibi Umriuzoq Quvvatov, xonanda Ixtiyor Jumanov, M.Toshmuhammedov nomidagi viloyat musiqali drama teatri aktyorlari, “Nasaf go‘zallari” raqs dastasi, “Yoshlar klubi” a’zolari, Qarshi tumani “Zarb” bolalar doirachilar guruhi, Yakkabog‘ tumani markaziy madaniyat va aholi dam olish markazi “An’anaviy xonandalik” to‘garagi ishtirokchilari Xasan va Ikrom Jabborovlar, Kitob tumani madaniyat va aholi dam olish markazi qoshidagi “Kitob gullari” ashula va raqs xalq ansambli, “Rizvongul” folklor etnografik jamoasi, “Tumorcha” bolalar folklor jamoalarining chiqishlari namoyish etildi.
Izoh (0)