O‘zbekiston Respublikasi Qurolli kuchlari tashkil etilganligining 24 yilligi hamda 14-yanvar – Vatan himoyachilari kuni Toshkent viloyati bojxona boshqarmasining “Olmaliq” va “Angren” tashqi iqtisodiy faoliyat bojxona postlarida xizmat qilayotgan bojxonachilar va ularning oila a’zolari uchun qo‘shaloq bayramga aylandi. Ayni shu kuni Angren shahrida 32 nafar bojxonachiga yangi xizmat uyining kalitlari tantanali ravishda topshirildi. Bu haqda Davlat bojxona qo‘mitasi Axborot xizmati “Daryo”ga xabar bermoqda.
Vazirlar Mahkamasining 2012-yil 11-yanvardagi “O‘zbekiston Respublikasi Davlat bojxona qo‘mitasi xodimlarini uy-joy sharoitlari darajasini yaxshilash chora-tadbirlari to‘g‘risida”gi Qaroriga asosan, bojxona xodimlarining istiqomat qilishlari uchun Toshkent viloyati va Toshkent shahrida joylashgan 6 ta bino Davlat bojxona qo‘mitasiga beg‘araz ajratildi.
Ular orasida Angren shahri 2/5 dahasida joylashgan xizmat uyi ham bo‘lib, mazkur obyekt yaqinda qayta rekonstruksiya qilindi va sifatli ta’mirlandi. Bu yerda barcha qulayliklar yaratilgan, zamonaviy mebel jihozlari, maishiy texnika buyumlari, xususan televizor, muzlatgich, kir yuvish mashinasi, konditsionerlar bilan ta’minlangan.
Bu yerda bojxonachilar va ularning oila a’zolari sport bilan muntazam shug‘ullanishlari uchun sport kompleksi hamda bolalar sport maydonchasi tashkil etilgan.
Izoh (0)