Futbol bo‘yicha O‘zbekiston olimpiya terma jamoasi delegatsiyasi Osiyo Futbol Konfederatsiyasi (OFK)ga murojaat qilib, Janubiy Koreya — O‘zbekiston (1:2) o‘yini bosh hakami Fahad al-Mirdasiyni ushbu Osiyo chempionatida O‘zbekiston ishtirokidagi o‘yinlarga tayinlamaslikni so‘radi. Bu haqda O‘zbekiston Futbol Federatsiyasi matbuot xizmati xabar bermoqda.
O‘zbekiston olimpiya terma jamoasi rahbariyati saudiyalik hakam Fahad al-Mirdasiy bir qancha epizodlarda o‘yin natijasiga ta’sir ko‘rsatgan qarorlar qabul qilgan, deb hisoblaydi. “Hakamning qarorlari tahlil qilinmaydi va biz buni juda yaxshi tushunamiz. Ammo o‘yindagi bir qancha vaziyatlarda hakam noto‘g‘ri qarorlari bilan o‘yin natijasiga ta’sir qildi”, — deyiladi OFKga yuborilgan murojaatnomada.
Shu bilan birga olimpiya terma jamoasi o‘zbekistonlik ishqibozlarning hakamlikdan norozilik kayfiyatidagi fikr-mulohazalaridan ham xabardor ekanligini bildirib, yuzaga kelgan murakkab vaziyatni o‘nglashga urinish maqsadida OFKga murojaat qilishga majbur bo‘lganligini yozadi.
O‘zbekiston olimpiya terma jamoasi 23 yoshgacha bo‘lgan futbolchilar o‘rtasidagi Osiyo chempionati “C” guruhida Janubiy Koreya, Iroq va Yaman terma jamoalari bilan kurashga kirishgan. Guruhning birinchi turida Janubiy Koreyaga qarshi maydonga tushgan o‘zbekistonlik olimpiyachilar 1:2 hisobida mag‘lubiyatga uchragan. Uchrashuvni Saudiya Arabistonidan taklif etilgan FIFA referisi Fahad al-Mirdasiy boshqargan edi.
O‘zbekiston olimpiya terma jamoasi guruhdagi ikkinchi uchrashuvini 16-yanvar kuni Iroqqa qarshi o‘tkazadi, Janubiy Koreya esa Yaman bilan o‘ynaydi. O‘zbekiston Iroqqa qarshi o‘yinda ko‘k formada maydonga tushadi. O‘yin Toshkent vaqti bilan 21:30 da boshlanadi. Uchrashuvni ummonlik hakamlar boshqarib boradi.
Izoh (0)