Футбол бўйича Ўзбекистон олимпия терма жамоаси делегацияси Осиё Футбол Конфедерацияси (ОФК)га мурожаат қилиб, Жанубий Корея — Ўзбекистон (1:2) ўйини бош ҳаками Фаҳад ал-Мирдасийни ушбу Осиё чемпионатида Ўзбекистон иштирокидаги ўйинларга тайинламасликни сўради. Бу ҳақда Ўзбекистон Футбол Федерацияси матбуот хизмати хабар бермоқда.
Ўзбекистон олимпия терма жамоаси раҳбарияти саудиялик ҳакам Фаҳад ал-Мирдасий бир қанча эпизодларда ўйин натижасига таъсир кўрсатган қарорлар қабул қилган, деб ҳисоблайди. «Ҳакамнинг қарорлари таҳлил қилинмайди ва биз буни жуда яхши тушунамиз. Аммо ўйиндаги бир қанча вазиятларда ҳакам нотўғри қарорлари билан ўйин натижасига таъсир қилди», — дейилади ОФКга юборилган мурожаатномада.
Шу билан бирга олимпия терма жамоаси ўзбекистонлик ишқибозларнинг ҳакамликдан норозилик кайфиятидаги фикр-мулоҳазаларидан ҳам хабардор эканлигини билдириб, юзага келган мураккаб вазиятни ўнглашга уриниш мақсадида ОФКга мурожаат қилишга мажбур бўлганлигини ёзади.
Ўзбекистон олимпия терма жамоаси 23 ёшгача бўлган футболчилар ўртасидаги Осиё чемпионати «C» гуруҳида Жанубий Корея, Ироқ ва Яман терма жамоалари билан курашга киришган. Гуруҳнинг биринчи турида Жанубий Кореяга қарши майдонга тушган ўзбекистонлик олимпиячилар 1:2 ҳисобида мағлубиятга учраган. Учрашувни Саудия Арабистонидан таклиф этилган ФИФА рефериси Фаҳад ал-Мирдасий бошқарган эди.
Ўзбекистон олимпия терма жамоаси гуруҳдаги иккинчи учрашувини 16 январь куни Ироққа қарши ўтказади, Жанубий Корея эса Яман билан ўйнайди. Ўзбекистон Ироққа қарши ўйинда кўк формада майдонга тушади. Ўйин Тошкент вақти билан 21:30 да бошланади. Учрашувни уммонлик ҳакамлар бошқариб боради.
Изоҳ (0)