FIFA referisi Ravshan Ermatov o‘zini futboldan boshqa sohada hech qachon tasavvur qilmagan. Bu haqda u RedPen nashriga bergan intervyusida aytib o‘tdi.
“To‘g‘risi, futboldan boshqa sohada o‘zimni tasavvur qila olmayman. Yetti yoshimdan faqat futbolchi bo‘lishni orzu qilganman, o‘zimni hech qachon hakam sifatida ko‘rmaganman. Futbolchiligimda o‘zim ham hakamlar bilan ko‘p tortishardim, har doim ularga nimalarnidir isbotlashga urinardim”, — dedi taniqli futbol hakami.
Ravshan Ermatov 17 yoshida, futbol uchrashuvlarining birida jiddiy jarohat oladi. Shunda unga futbol hakami bo‘lishni tavsiya qilishadi, biroq u bu taklifni qat’iy rad etib, bolalar murabbiyi litsenziyasi uchun o‘qiydi, bu vaqtda bir bolalar jamoasiga ustozlik qilayotgan otasi, sobiq hakam Sayfiddin Ermatovga yordamchilik qiladi.
“Har yakshanba shahar birinchiligi uchrashuvlari bo‘lib o‘tardi. Bir safar bizning o‘yinga hakam kelmadi. Shunda otam qo‘limga hushtak tutqazib, shunchaki majburiyat qo‘ydi: ‘O‘yinni bekor qila olmaymiz-ku’. Maydonga chiqdim. Kutilmaganda, xuddi o‘zim futbol o‘ynagandek zavq oldim”, — dedi Ermatov.
“Meni sindirgan futbolchini qachonlardir xayolimda koyirdim. Axir mening katta — O‘zbekiston milliy terma jamoasida to‘p surish orzuim bor edi. Keyin, ‘hakam kelmapti’, deyishganida, juda jahlim chiqqandi, ‘qanday qilib bu qadar mas’uliyatsiz bo‘lish mumkin’, deb o‘ylagandim. Hozir esa ularning ikkisidan ham minnatdorman. Agar o‘sha o‘yinchi menga jarohat yetkazmaganida va o‘sha hakam o‘yinga kelganida, ehtimol, bugun futbol hakami bo‘lmasdim”, — deya qo‘shimcha qildi Ravshan Ermatov.
Izoh (0)