Futbol bo‘yicha 2014-yilgi jahon chempionati final uchrashuvini boshqargan italiyalik hakam Nikola Ritssoli finalni Ravshan Ermatov boshchiligidagi hakamlar brigadasi boshqaradi, deb o‘ylagan. Bu haqda axborot bergan RedPen nashri, final arafasida hakamlar orasida qanday gap-so‘zlar bo‘lgani masalasida Ravshan Ermatovga murojaat qildi.
Eslatib o‘tamiz, o‘zbekistonlik FIFA referisi Ravshan Ermatov BAAda tashkil etilgan Global Soccer Awards taqdimotida “Yilning eng yaxshi hakami” deb topildi. Unga mukofotni aynan Nikola Ritssoli topshirdi.
Mazkur taqdimot doirasida tashkil etilgan konferensiyada Ritssoli, JCh—2014 final uchrashuvi hakami nomini e’lon qilish uchun FIFA barcha hakamlarni bir xonaga to‘plaganida, u Ermatovni kuzatib o‘tirganini, chunki final aynan Ermatovga berilishiga ishongani va bu xabarni Ermatov qanday qabul qilishini ko‘rmoqchi bo‘lganini aytib o‘tgandi.
“Albatta, final uchrashuvi hakami nomi e’lon qilinganidan so‘ng, bir-birimiz bilan gaplashganmiz. Ritssolining aytishicha, hakamlar korpusida ko‘pchilik final Ermatovga beriladi, deb o‘ylagan, aksariyati bunga shubha ham qilmagan, biroq omad italiyaliklarga kulib boqdi”, — dedi Ermatov.
“Ritssolining aytishicha, u finalni biz boshqarishimizga shu qadar ishonganidan, hakam nomi e’lon qilinadigan vaqtda, faqat menga qarab o‘tirgan, men bunga qanday munosabat bildirishimni ko‘rmoqchi bo‘lgan. Avvalgi jahon chempionatlari finaliga tayinlangan hakamlar nomi e’lon qilinganida, nimalar bo‘lganini bilaman. 2006-yili argentinalik Orasio Elisondo xursandchiligidan yig‘lab yuborgan, 2010-yili esa Hovard Uebb baxtiyorligidan sakrashni boshlagandi, tasavvur qilyapsizmi?”, — dedi Ermatov.
“Ritssoli o‘shanda oldimga kelib, butun hayoti ko‘z oldidan o‘tib ketgani va o‘n daqiqacha o‘ziga kela olmaganini tan olib aytgandi. Keyin, ‘Ravshan, to‘g‘risi, finalni senga topshirishadi, deb o‘ylagandim. Sen bunga loyiqsan. Biroq omad bizga kulib boqdi’, — degandi. Men unga javoban, o‘sha vaqtda Braziliyada qolgan so‘nggi to‘rtta hakamlar brigadasining har biri finalga loyiqligini aytib, uni tabriklagandim va tribunadan turib, uni qo‘llab-quvvatlab turishimizni aytgandim”, — dedi o‘zbekistonlik hakam.
“Har kimda har xil holat bo‘ladi, chunki bu haqiqatan ham hakam faoliyatidagi eng muhim voqea hisoblanadi. Albatta, biz hammamiz final uchrashuvini boshqarish niyatida yonayotgandik, chunki bundan-da yuqoriroq, oliyroq narsa yo‘q. Agar finalni boshqarsang, o‘z sohangda Everestga chiqqan hisoblanasan. Aytmoqchi, agar finalga menga topshirishganda, bilmadim, qanday ahvolga tushardim. Bilmadim”, — dedi Ravshan Ermatov.
Izoh (0)