Футбол бўйича 2014 йилги жаҳон чемпионати финал учрашувини бошқарган италиялик ҳакам Никола Риццоли финални Равшан Эрматов бошчилигидаги ҳакамлар бригадаси бошқаради, деб ўйлаган. Бу ҳақда ахборот берган RedPen нашри, финал арафасида ҳакамлар орасида қандай гап-сўзлар бўлгани масаласида Равшан Эрматовга мурожаат қилди.
Эслатиб ўтамиз, ўзбекистонлик ФИФА рефериси Равшан Эрматов БААда ташкил этилган Global Soccer Awards тақдимотида «Йилнинг энг яхши ҳаками» деб топилди. Унга мукофотни айнан Никола Риццоли топширди.
Мазкур тақдимот доирасида ташкил этилган конференцияда Риццоли, ЖЧ—2014 финал учрашуви ҳаками номини эълон қилиш учун ФИФА барча ҳакамларни бир хонага тўплаганида, у Эрматовни кузатиб ўтирганини, чунки финал айнан Эрматовга берилишига ишонгани ва бу хабарни Эрматов қандай қабул қилишини кўрмоқчи бўлганини айтиб ўтганди.
«Албатта, финал учрашуви ҳаками номи эълон қилинганидан сўнг, бир-биримиз билан гаплашганмиз. Риццолининг айтишича, ҳакамлар корпусида кўпчилик финал Эрматовга берилади, деб ўйлаган, аксарияти бунга шубҳа ҳам қилмаган, бироқ омад италияликларга кулиб боқди», — деди Эрматов.
«Риццолининг айтишича, у финални биз бошқаришимизга шу қадар ишонганидан, ҳакам номи эълон қилинадиган вақтда, фақат менга қараб ўтирган, мен бунга қандай муносабат билдиришимни кўрмоқчи бўлган. Аввалги жаҳон чемпионатлари финалига тайинланган ҳакамлар номи эълон қилинганида, нималар бўлганини биламан. 2006 йили аргентиналик Орасио Элисондо хурсандчилигидан йиғлаб юборган, 2010 йили эса Ҳовард Уэбб бахтиёрлигидан сакрашни бошлаганди, тасаввур қиляпсизми?», — деди Эрматов.
«Риццоли ўшанда олдимга келиб, бутун ҳаёти кўз олдидан ўтиб кетгани ва ўн дақиқача ўзига кела олмаганини тан олиб айтганди. Кейин, ‘Равшан, тўғриси, финални сенга топширишади, деб ўйлагандим. Сен бунга лойиқсан. Бироқ омад бизга кулиб боқди’, — деганди. Мен унга жавобан, ўша вақтда Бразилияда қолган сўнгги тўртта ҳакамлар бригадасининг ҳар бири финалга лойиқлигини айтиб, уни табриклагандим ва трибунадан туриб, уни қўллаб-қувватлаб туришимизни айтгандим», — деди ўзбекистонлик ҳакам.
«Ҳар кимда ҳар хил ҳолат бўлади, чунки бу ҳақиқатан ҳам ҳакам фаолиятидаги энг муҳим воқеа ҳисобланади. Албатта, биз ҳаммамиз финал учрашувини бошқариш ниятида ёнаётгандик, чунки бундан-да юқорироқ, олийроқ нарса йўқ. Агар финални бошқарсанг, ўз соҳангда Эверестга чиққан ҳисобланасан. Айтмоқчи, агар финалга менга топширишганда, билмадим, қандай аҳволга тушардим. Билмадим», — деди Равшан Эрматов.
Изоҳ (0)