Toshkentda oq Nexia haydovchisi qariyb bir daqiqada kamida uchta qoidabuzarlikni amalga oshirdi

Toshkent shahridagi ko‘chalardan birida Nexia avtomobili haydovchisi tomonidan amalga oshirilgan va Yo‘l harakati qoidalariga zid holatlar aks etgan videoyozuv Mover xizmatiga joylashtirildi. Video avtomobil registratori yordamida olingan bo‘lib, holat 2-yanvar kuni soat 20:53 da yuz bergan.

Videoyozuvda davlat raqam belgisi 01 D 775 WA bo‘lgan oq rangli Nexia avtomobili dastlab svetoforning taqiqlovchi qizil chirog‘iga to‘xtamay, harakatni katta tezlikda davom ettirib ketganini ko‘rish mumkin. Oradan ko‘p o‘tmay, u yo‘l o‘rtasida keskin burilib to‘xtab, orqamacha harakatlana boshlangan va yana keskinlik bilan o‘z yo‘nalishini to‘g‘rilagan.

Videoyozuvni Mover’ga joylashtirgan foydalanuvchining fikricha, oq Nexia haydovchisi o‘zining bu xatti-harakatlari bilan nafaqat o‘zi uchun, balki qatnovning boshqa ishtirokchilari uchun ham xavfli vaziyatlarni yuzaga keltirgan. Ushbu videoyozuv Facebook’dagi ommabop guruhlarda ham ulashilgan.

Mover videoxizmati foydalanuvchilari ham, Facebook ijtimoiy tarmog‘i foydalanuvchilari ham oq rangli Nexia haydovchisining harakatlarini keskin tanqid qilgan, bir necha foydalanuvchi mazkur videoaxborotni, qoidabuzar haydovchiga nisbatan chora ko‘rilishi uchun, Davlat yo‘l harakati xavfsizligi xizmatiga topshirish zarurligini ta’kidlagan.

Ba’zi foydalanuvchilar holatni o‘ta keskin tanqid qilib: “O‘g‘li uchun mashina va haydovchilik guvohnomasini sotib olib bergan ota-ona bu ketishda yaqinda tobut ham sotib olib beradi”, — qabilida fikr bildirgan bo‘lsa, boshqa bir kommentator vaziyatga kinoya bilan yondashgan: “Balki qizil chiroqni ko‘rmay o‘tib ketib, keyin orqaga qaytmoqchi bo‘lgandiru, shu vaqt birdan yashil chiroq yonib qolgan bo‘lsa-chi?”.

Ma’lumot uchun, Ma’muriy javobgarlik to‘g‘risidagi kodeksga muvofiq, haydovchilarning svetoforning taqiqlovchi signali (qizil chiroq)ga bo‘ysunmasdan o‘tishi eng kam ish haqi (EKIH)ning ikki baravari miqdorida (6-yanvar holatiga ko‘ra — 260 480 so‘m), avariya holati yuzaga kelishiga sabab bo‘lgan huquqbuzarlikni sodir etishi EKIHning o‘n baravari (1 302 400 so‘m), belgilangan harakat tezligini soatiga 20 kilometrdan ko‘p bo‘lmagan kattalikda oshirib yuborishi EKIHning bir baravari (130 240 so‘m), harakat tezligini soatiga 20 kilometrdan ortiq, lekin 40 kilometrdan ko‘p bo‘lmagan kattalikda oshirib yuborishi esa EKIHning besh baravari (651 200 so‘m) miqdorida jarima solinishiga sabab bo‘ladi.