Тошкентда оқ Nexia ҳайдовчиси қарийб бир дақиқада камида учта қоидабузарликни амалга оширди

Тошкент шаҳридаги кўчалардан бирида Nexia автомобили ҳайдовчиси томонидан амалга оширилган ва Йўл ҳаракати қоидаларига зид ҳолатлар акс этган видеоёзув Mover хизматига жойлаштирилди. Видео автомобиль регистратори ёрдамида олинган бўлиб, ҳолат 2 январь куни соат 20:53 да юз берган.

Видеоёзувда давлат рақам белгиси 01 D 775 WA бўлган оқ рангли Nexia автомобили дастлаб светофорнинг тақиқловчи қизил чироғига тўхтамай, ҳаракатни катта тезликда давом эттириб кетганини кўриш мумкин. Орадан кўп ўтмай, у йўл ўртасида кескин бурилиб тўхтаб, орқамача ҳаракатлана бошланган ва яна кескинлик билан ўз йўналишини тўғрилаган.

Видеоёзувни Mover’га жойлаштирган фойдаланувчининг фикрича, оқ Nexia ҳайдовчиси ўзининг бу хатти-ҳаракатлари билан нафақат ўзи учун, балки қатновнинг бошқа иштирокчилари учун ҳам хавфли вазиятларни юзага келтирган. Ушбу видеоёзув Facebook’даги оммабоп гуруҳларда ҳам улашилган.

Mover видеохизмати фойдаланувчилари ҳам, Facebook ижтимоий тармоғи фойдаланувчилари ҳам оқ рангли Nexia ҳайдовчисининг ҳаракатларини кескин танқид қилган, бир неча фойдаланувчи мазкур видеоахборотни, қоидабузар ҳайдовчига нисбатан чора кўрилиши учун, Давлат йўл ҳаракати хавфсизлиги хизматига топшириш зарурлигини таъкидлаган.

Баъзи фойдаланувчилар ҳолатни ўта кескин танқид қилиб: «Ўғли учун машина ва ҳайдовчилик гувоҳномасини сотиб олиб берган ота-она бу кетишда яқинда тобут ҳам сотиб олиб беради», — қабилида фикр билдирган бўлса, бошқа бир комментатор вазиятга киноя билан ёндашган: «Балки қизил чироқни кўрмай ўтиб кетиб, кейин орқага қайтмоқчи бўлгандиру, шу вақт бирдан яшил чироқ ёниб қолган бўлса-чи?».

Маълумот учун, Маъмурий жавобгарлик тўғрисидаги кодексга мувофиқ, ҳайдовчиларнинг светофорнинг тақиқловчи сигнали (қизил чироқ)га бўйсунмасдан ўтиши энг кам иш ҳақи (ЭКИҲ)нинг икки баравари миқдорида (6 январь ҳолатига кўра — 260 480 сўм), авария ҳолати юзага келишига сабаб бўлган ҳуқуқбузарликни содир этиши ЭКИҲнинг ўн баравари (1 302 400 сўм), белгиланган ҳаракат тезлигини соатига 20 километрдан кўп бўлмаган катталикда ошириб юбориши ЭКИҲнинг бир баравари (130 240 сўм), ҳаракат тезлигини соатига 20 километрдан ортиқ, лекин 40 километрдан кўп бўлмаган катталикда ошириб юбориши эса ЭКИҲнинг беш баравари (651 200 сўм) миқдорида жарима солинишига сабаб бўлади.