Hindistonga iqlim o‘zgarishi oqibatlariga qarshi kurashish uchun 2030-yilgacha 1 trln dollar kerak bo‘ladi

Hindistonga iqlimning o‘zgarishi oqibatlariga qarshi kurashish uchun 2030-yilgacha kamida bir trillion dollar kerak bo‘ladi. Bu haqda “TASS” xabar bermoqda.

Bu muammo mamlakatning Energetika, atrof-muhit va suv resurslari Kengashining Gandinagar shahridagi texnologiya instituti va Ahmadobod shahridagi menejment instituti bilan hamkorligida tayyorlagan hisobotida ma’lum qilindi.

Olimlarning fikriga ko‘ra, o‘rtacha yillik haroratning Selsiy o‘lchami bilan ikki darajaga oshishini 800 million hindistonlik yoki mamlakatning 64 foiz aholisi sezib ulgurdi.

Hisobot mualliflari “2016—2045-yillar davomida Hindistondagi havoning o‘rtacha yillik harorati 1–1,5 darajaga oshadi va bu qishloq xo‘jaligi, ayniqsa, o‘simliklarga salbiy ta’sir qiladi”, deya ta’kidlamoqda.

Mutaxassislarning hisob-kitoblariga asosan, faqatgina 2013—2014-yillar davomida iqlimning o‘zgarishiga moslashish uchun mamlakat 91,8 milliard dollar sarflagan. Ma’lumotlarga ko‘ra, 2030-yilga kelib bu raqam ko‘payib 360 milliardga yetishi mumkin.

1971-yildan 2007-yilgacha Hindistondagi havoning o‘rtacha yillik harorati har o‘n yilda taxminan 0,2 darajaga o‘sib kelgan bo‘lib, so‘nggi 100 yil ichida mamlakatdagi issiq havo Selsiy o‘lchami bilan 1,02 darajaga o‘sdi.