Ҳиндистонга иқлим ўзгариши оқибатларига қарши курашиш учун 2030 йилгача 1 трлн доллар керак бўлади

Ҳиндистонга иқлимнинг ўзгариши оқибатларига қарши курашиш учун 2030 йилгача камида бир триллион доллар керак бўлади. Бу ҳақда «ТАСС» хабар бермоқда.

Бу муаммо мамлакатнинг Энергетика, атроф-муҳит ва сув ресурслари Кенгашининг Гандинагар шаҳридаги технология институти ва Аҳмадобод шаҳридаги менежмент институти билан ҳамкорлигида тайёрлаган ҳисоботида маълум қилинди.

Олимларнинг фикрига кўра, ўртача йиллик ҳароратнинг Цельсий ўлчами билан икки даражага ошишини 800 миллион ҳиндистонлик ёки мамлакатнинг 64 фоиз аҳолиси сезиб улгурди.

Ҳисобот муаллифлари «2016—2045 йиллар давомида Ҳиндистондаги ҳавонинг ўртача йиллик ҳарорати 1–1,5 даражага ошади ва бу қишлоқ хўжалиги, айниқса, ўсимликларга салбий таъсир қилади», дея таъкидламоқда.

Мутахассисларнинг ҳисоб-китобларига асосан, фақатгина 2013—2014 йиллар давомида иқлимнинг ўзгаришига мослашиш учун мамлакат 91,8 миллиард доллар сарфлаган. Маълумотларга кўра, 2030 йилга келиб бу рақам кўпайиб 360 миллиардга етиши мумкин.

1971 йилдан 2007 йилгача Ҳиндистондаги ҳавонинг ўртача йиллик ҳарорати ҳар ўн йилда тахминан 0,2 даражага ўсиб келган бўлиб, сўнгги 100 йил ичида мамлакатдаги иссиқ ҳаво Цельсий ўлчами билан 1,02 даражага ўсди.