AQShning Xyuston shahrida og‘ir atletika bo‘yicha kattalar o‘rtasida o‘tkazilayotgan jahon chempionatida ayni paytga kelib o‘zbekistonlik 12 nafar sportchidan 7 nafari bahslarda ishtirok etdi. Bu haqda O‘zbekiston Milliy olimpiya qo‘mitasi matbuot xizmati xabar bermoqda.
Xotin-qizlar o‘rtasida 69 kg vazn toifasida bahslarga kirishgan Manzuraxon Mamasoliyeva dast ko‘tarishda 102 kg, siltab ko‘tarishda esa 131 kg toshni o‘ziga bo‘ysindirdi va ikkikurash yakuniga ko‘ra 233 kg natija qayd etib, “B” guruhida birinchi o‘rinni egalladi. Ushbu vazn toifasida “A” guruhi vakillarining chiqishidan so‘ng, yakuniy natijalar e’lon qilinadi.
Erkaklar o‘rtasidagi 85 kg vazn toifasida “A” guruhidan o‘rin olgan sportchilar o‘rtasida musobaqa o‘tkazilib, yakuniy natijalar ma’lum bo‘ldi. Unga ko‘ra, o‘zbekistonlik sportchilardan Ulug‘bek Alimov 360 kg natija bilan 8-o‘rinni, Muhammad Begaliyev esa 344 kg ko‘rsatkich bilan 16-o‘rinni egalladi.
Eslatib o‘tamiz, Alimov va Begaliyev bir kun oldin o‘z guruhlarida ikkinchi bo‘lgandi.
Izoh (0)