АҚШнинг Хьюстон шаҳрида оғир атлетика бўйича катталар ўртасида ўтказилаётган жаҳон чемпионатида айни пайтга келиб ўзбекистонлик 12 нафар спортчидан 7 нафари баҳсларда иштирок этди. Бу ҳақда Ўзбекистон Миллий олимпия қўмитаси матбуот хизмати хабар бермоқда.
Хотин-қизлар ўртасида 69 кг вазн тоифасида баҳсларга киришган Манзурахон Мамасолиева даст кўтаришда 102 кг, силтаб кўтаришда эса 131 кг тошни ўзига бўйсиндирди ва иккикураш якунига кўра 233 кг натижа қайд этиб, «B» гуруҳида биринчи ўринни эгаллади. Ушбу вазн тоифасида «A» гуруҳи вакилларининг чиқишидан сўнг, якуний натижалар эълон қилинади.
Эркаклар ўртасидаги 85 кг вазн тоифасида «A» гуруҳидан ўрин олган спортчилар ўртасида мусобақа ўтказилиб, якуний натижалар маълум бўлди. Унга кўра, ўзбекистонлик спортчилардан Улуғбек Алимов 360 кг натижа билан 8-ўринни, Муҳаммад Бегалиев эса 344 кг кўрсаткич билан 16-ўринни эгаллади.
Эслатиб ўтамиз, Алимов ва Бегалиев бир кун олдин ўз гуруҳларида иккинчи бўлганди.
Изоҳ (0)