Fransiya mehmonxona va kafelari teraktlardan keyingi haftada mijozlarining 50 foizini yo‘qotdi

Fransiyadagi mehmonxona, restoran va barlarning mijozlari Parijdagi teraktlardan so‘ng 30—50 foizga kamaydi. Bu haqda mazkur muassasalar egalari milliy kasaba uyushmasi (Synhorcat-GNI) ma’lumotlariga tayanib, “Interfaks” xabar bermoqda.

Jumladan, 13—19-noyabr kunlari mehmonxonalar bandligi bundan oldingi haftaga nisbatan 51 foizga pasaygan. Kafe va barlarga tashrif 37, restoranlarga esa 38 foizga kamayib ketgan. 20 dan 31-dekabrgacha, Rojdestvo bayramlarida mehmonxonalar bandligi o‘tgan yilga solishtirganda 34 foizga kam bo‘lishi kutilmoqda. Bar va kafelarda ham shunday ko‘rsatkich taxmin qilinmoqda, restoranlarda esa holat birmuncha yaxshi bo‘lishi mumkin (27% ga pasayish).  Tantanali qabul va shunga o‘xshash tadbir tashkilotchilarida buyurtmalarning bekor qilinishi 80 foizga yetmoqda.

Fransiya turoperatorlari ma’lumotlariga ko‘ra, Fransiyadan chetga sayohatga chiquvchilar soni ham sezilarli darajada kamaygan: pasayish 10 dan 30 foizgachani tashkil etmoqda, xususan, musulmon mamlakatlariga safar qilish istagidagilar safi siyraklashgani qayd etilmoqda.