Франция меҳмонхона ва кафелари терактлардан кейинги ҳафтада мижозларининг 50 фоизини йўқотди

Франциядаги меҳмонхона, ресторан ва барларнинг мижозлари Париждаги терактлардан сўнг 30—50 фоизга камайди. Бу ҳақда мазкур муассасалар эгалари миллий касаба уюшмаси (Synhorcat-GNI) маълумотларига таяниб, «Интерфакс» хабар бермоқда.

Жумладан, 13—19 ноябрь кунлари меҳмонхоналар бандлиги бундан олдинги ҳафтага нисбатан 51 фоизга пасайган. Кафе ва барларга ташриф 37, ресторанларга эса 38 фоизга камайиб кетган. 20 дан 31 декабргача, Рождество байрамларида меҳмонхоналар бандлиги ўтган йилга солиштирганда 34 фоизга кам бўлиши кутилмоқда. Бар ва кафеларда ҳам шундай кўрсаткич тахмин қилинмоқда, ресторанларда эса ҳолат бирмунча яхши бўлиши мумкин (27% га пасайиш).  Тантанали қабул ва шунга ўхшаш тадбир ташкилотчиларида буюртмаларнинг бекор қилиниши 80 фоизга етмоқда.

Франция туроператорлари маълумотларига кўра, Франциядан четга саёҳатга чиқувчилар сони ҳам сезиларли даражада камайган: пасайиш 10 дан 30 фоизгачани ташкил этмоқда, хусусан, мусулмон мамлакатларига сафар қилиш истагидагилар сафи сийраклашгани қайд этилмоқда.