AQShning Merilend shtati, Baltimor shahridagi xalqaro aeroportda politsiya bortdagi qo‘shnilari bo‘lgan ayol ulardan birining telefoniga “dinamit” so‘zi yozilgan SMS kelganligini da’vo qilgach, to‘rt nafar yo‘lovchini aviareysdan olib qoldi. Bu haqda 25-noyabr, chorshanba kuni Merilend politsiyasi transport boshqarmasi vakili Jonatan Grin ma’lum qildi, deya xabar beradi “TASS”.
Hodisa 17-noyabr kuni aeroportning uchish maydoniga chiqqan va Chikago shahriga yo‘l olgan Spirit Airlines aviakompaniyasi samolyoti bortida ro‘y berdi. Yo‘lovchi ayollardan biri ekipajga u bilan yonma-yon o‘tirgan qo‘shnisi bir necha bor telefon qo‘ng‘irog‘i qilgani va inglizcha gaplashmagani, uning mobil telefonida BLR Dynamit (BLR — Hindistonnning Bangalor shahridagi xalqaro aeroport kodi) yozuvini ko‘rganligini da’vo qilgan.
Natijada samolyot parvoz qilmay, terminalga qaytdi. “Shubhali” yo‘lovchi va uning uch nafar hamrohi so‘roq qilindi va ayblov e’lon qilinmay, qo‘yib yuborildi. “Uning mobil telefonidan ‘dinamit’ so‘zi mavjud xabar topilmadi”, deya ta’kidlagan Grin.
Parijdagi teraktlardan so‘ng AQShda, xususan, Nyu-York, Boston, Mayami, Chikago va Los-Anjelesda xavfsizlik choralari kuchaytirilgan. Garchi aniq xavf-xatar bo‘lmasa-da, rasmiylar amerikaliklarni hushyorlikni boy bermaslikka chaqirmoqda.
Izoh (0)