Samarqand viloyati Jomboy tumani hokimligidan 2016-yilgi g‘alla ekini uchun 5,5 gektar qo‘shimcha yer olgan “Elbek Boshmonov” fermer xo‘jaligi g‘alla ekishga kechikdi, deya xabar bermoqda “Zarafshon” gazetasi.
Mazkur yer maydoni o‘rnida ilgari tokzor bo‘lgan. Tuman hokimining qarori bilan samarasiz foydalanib kelingan xususiy bog‘ va tok maydonlari tuman zaxira yerlariga qaytarib olingan va g‘alla ekini uchun “Elbek Boshmonov” fermer xo‘jaligiga berilgan.
“Ammo bu yerni fuqarolar o‘zboshimchalik bilan tomorqaga aylantirib olib, loviya, kartoshka va boshqa ekinlar ekkan. Fermer bir necha marta ogohlantirib, natijaga erisholmagach, tegishli tashkilotlarga arz qilgan”, — deydi Adliya vazirligi huzuridagi yuristlar malakasini oshirish markazi tinglovchisi Mizrob Bahriyev.
Xabar berishlaricha, bu ish Fuqarolik ishlari bo‘yicha Jomboy tumanlararo sudida ko‘rib chiqilib, fermer xo‘jaligi foydasiga hal etilgan. “Ammo fermerning hosili kechikadigan bo‘ldi”, — deb yozadi gazeta.
Fuqarolar tomonidan ekilgan ekinlar taqdiri qanday kechgani, yerni tomorqaga aylantirgan fuqarolarga qanday chora ko‘rilganiga gazeta xabarida aniqlik kiritilmagan.
Izoh (0)