Xalqaro og‘ir atletika federatsiyasi (IWF) ijroiya qo‘mitasi Bolgariya terma jamoasini 2016-yili Rio-de-Janeyro shahri (Braziliya)da o‘tkaziladigan XXXI yozgi Olimpiada o‘yinlaridan chetlatish haqida qaror qabul qildi, deb xabar beradi O‘zbekiston Milliy olimpiya qo‘mitasi matbuot xizmati.
Bunga sabab bolgariyalik og‘ir atletikachilarni tez-tez dopingga qarshi kurash qoidalarini buzganligi bo‘ldi. Jumladan, joriy yilning mart oyida Bolgariya terma jamoasining 8 nafar erkak va 3 nafar ayol sportchisida taqiqlangan dori vositalaridan foydalanganligi aniqlangan.
Bundan tashqari IWF Ruminiya terma jamoasidan bitta Olimpiya yo‘llanmani olib tashladi. Buning boisi ushbu yurt vakillaridan saralash musobaqalarida bir necha bor taqiqlangan dori vositalarini iste’mol qilinganligi aniqlangan.
Xalqaro og‘ir atletika federatsiyasi, shuningdek, Xyuston shahri (AQSh)da o‘tkazilayotgan jahon chempionati bahslaridan Tojikiston, Gonduras, Gvatemala, Panama va Syerra-Leone davlati terma jamoalarini chetlatishga qaror qildi. Yuqorida nomlari zikr etilgan davlat vakillari dopingga qarshi kurash xizmati xodimlariga o‘zlarining qayerda ekanliklarini ma’lum qilmaganligi bois, mana shunday keskin qarorga kelingan.
Izoh (0)