Toshkentdagi Xalqaro hamkorlik markazida 12-noyabr kuni Iqtisodiy, sanoat va ilmiy-texnikaviy hamkorlik bo‘yicha O‘zbekiston – Latviya hukumatlararo komissiyasining navbatdagi majlisi bo‘lib o‘tdi. Bu haqda O‘zA xabar berdi.
Tadbirda ikki mamlakatning tashqi iqtisodiy aloqalar, savdo-sanoat, sarmoya, atrof-muhitni muhofaza qilish, fan-ta’lim, qishloq va suv xo‘jaligi, oziq-ovqat sanoati, sog‘liqni saqlash, sayyohlik, axborot texnologiyalari, transport va transport kommunikatsiyalari, temir yo‘l, aviatashuv, tranzit, logistika, qurilish materiallari ishlab chiqarish kabi sohalar uchun mas’ul vazirlik va idoralari, kompaniya va konsernlari rahbarlari ishtirok etdi.
Hukumatlararo komissiya majlisida O‘zbekiston va Latviya o‘zaro tovar ayirboshlash hajmini yanada oshirishdan, keng ko‘lamli savdo-iqtisodiy, sarmoyaviy va ilmiy-texnikaviy hamkorlikni kengaytirishdan manfaatdor ekani ta’kidlandi. Ikki mamlakat yuklar tranziti, logistika, transport va transport kommunikatsiyalari, ilm-fan, sayyohlik, xususiy tadbirkorlik kabi sohalarda hamkorlikni rivojlantirish borasida katta salohiyatga ega ekani qayd etildi.
Qayd etishlaricha, O‘zbekiston va Latviya o‘rtasidagi o‘zaro tovar ayirboshlash hajmi muntazam oshmoqda. 2014-yilda bu ko‘rsatkich 245,7 million, 2015-yilning yanvar—sentyabr oylarida qariyb 135 million dollarni tashkil qildi.
Latviya delegatsiyasi O‘zbekistonda olib borilayotgan iqtisodiy siyosat samaralari, aksiyadorlik jamiyatlariga xorijiy investitsiyalarni jalb qilish uchun yaratilayotgan sharoitlar, “Navoiy”, “Jizzax” va “Angren” industrial zonalaridagi imkoniyatlar bilan tanishtirildi. O‘zaro hamkorlikni yanada faollashtirish uchun mavjud imkoniyatlarni to‘liq ishga solish lozimligi ta’kidlandi.
Shu kuni O‘zbekiston va Latviya ishbilarmon doiralarining biznes-forumi ham bo‘lib o‘tdi. Unda fan va texnika, import-eksport, yuk tashish, oziq-ovqat sanoati sohalaridagi hamkorlikni yanada rivojlantirish, O‘zbekistondagi xususiylashtirish jarayoniga Latviya kompaniyalarini keng jalb etish yuzasidan fikr almashildi.
Ma’lumot uchun, O‘zbekiston Latviyaga paxta tolasi, meva-sabzavotlar, neft mahsulotlari, mineral o‘g‘itlar, rangli metall va boshqa tovarlar eksport qiladi. Latviya O‘zbekistonga uskunalar, transport vositalari, dengiz mahsulotlari, plastmassa yetkazib beradi, logistika xizmati ko‘rsatadi. O‘zbekistonda Latviya sarmoyasi ishtirokida tuzilgan 32 qo‘shma korxona faoliyat ko‘rsatmoqda, Latviyaning 16 kompaniyasi O‘zbekistonda o‘z vakolatxonasini ochgan.
Izoh (0)