Click tizimiga ulangan foydalanuvchilarning soni 1 000 000 dan oshdi, deya xabar bermoqda kompaniya matbuot xizmati.
Click tizimida ID-1000000 ro‘yxat raqami bilan qayd qilingan yangi foydalanuvchi Qashqadaryo viloyatida istiqomat qiluvchi Niyozov O‘ktam Hayitovich bo‘ldi. Unga maxsus qimmatbaho sovg‘a – Samsung Galaxy S6 mobil telefoni taqdim qilinadi.
“Kompaniyamiz tomonidan ishlab chiqarilgan tizim 1 milliondan ortiq foydalanuvchilarning ishonchini qozonganidan juda mamnunmiz. Bu tanlagan rivojlanish yo‘limiz to‘g‘riligidan dalolat bermoqda va bundan buyon ham tizimimiz rivojiga katta e’tibor beramiz”, — dedi Click kompaniyasi direktori Ulug‘bek Rustamov.
Click tizimi — mobil banking tizimi bo‘lib, jismoniy shaxslarga mobil telefon orqali (USSD\SMS yordamida) yoki Internet orqali (Web\Web-mobile vositasida) turli hamkorlarning tovar va xizmatlari uchun to‘lovlarni amalga oshirish imkonini beradi. Tizim 2011-yil noyabr oyida tashkil qilingan Click MChJ kompaniyasi tomonidan ishlab chiqarilgan. Kompaniya faoliyatining asosiy yo‘nalishi – tijorat banklari, tashkilotlar, jismoniy shaxslar uchun dasturiy mahsulot ishlab chiqish, ularni joriy etish, turli apparat-dasturiy komplekslarga moslashtirish va yanada takomillashtirishdir.
Izoh (0)