Тошкентдаги Халқаро ҳамкорлик марказида 12 ноябрь куни Иқтисодий, саноат ва илмий-техникавий ҳамкорлик бўйича Ўзбекистон – Латвия ҳукуматлараро комиссиясининг навбатдаги мажлиси бўлиб ўтди. Бу ҳақда ЎзА хабар берди.
Тадбирда икки мамлакатнинг ташқи иқтисодий алоқалар, савдо-саноат, сармоя, атроф-муҳитни муҳофаза қилиш, фан-таълим, қишлоқ ва сув хўжалиги, озиқ-овқат саноати, соғлиқни сақлаш, сайёҳлик, ахборот технологиялари, транспорт ва транспорт коммуникациялари, темир йўл, авиаташув, транзит, логистика, қурилиш материаллари ишлаб чиқариш каби соҳалар учун масъул вазирлик ва идоралари, компания ва концернлари раҳбарлари иштирок этди.
Ҳукуматлараро комиссия мажлисида Ўзбекистон ва Латвия ўзаро товар айирбошлаш ҳажмини янада оширишдан, кенг кўламли савдо-иқтисодий, сармоявий ва илмий-техникавий ҳамкорликни кенгайтиришдан манфаатдор экани таъкидланди. Икки мамлакат юклар транзити, логистика, транспорт ва транспорт коммуникациялари, илм-фан, сайёҳлик, хусусий тадбиркорлик каби соҳаларда ҳамкорликни ривожлантириш борасида катта салоҳиятга эга экани қайд этилди.
Қайд этишларича, Ўзбекистон ва Латвия ўртасидаги ўзаро товар айирбошлаш ҳажми мунтазам ошмоқда. 2014 йилда бу кўрсаткич 245,7 миллион, 2015 йилнинг январь—сентябр ойларида қарийб 135 миллион долларни ташкил қилди.
Латвия делегацияси Ўзбекистонда олиб борилаётган иқтисодий сиёсат самаралари, акциядорлик жамиятларига хорижий инвестицияларни жалб қилиш учун яратилаётган шароитлар, «Навоий», «Жиззах» ва «Ангрен» индустриал зоналаридаги имкониятлар билан таништирилди. Ўзаро ҳамкорликни янада фаоллаштириш учун мавжуд имкониятларни тўлиқ ишга солиш лозимлиги таъкидланди.
Шу куни Ўзбекистон ва Латвия ишбилармон доираларининг бизнес-форуми ҳам бўлиб ўтди. Унда фан ва техника, импорт-экспорт, юк ташиш, озиқ-овқат саноати соҳаларидаги ҳамкорликни янада ривожлантириш, Ўзбекистондаги хусусийлаштириш жараёнига Латвия компанияларини кенг жалб этиш юзасидан фикр алмашилди.
Маълумот учун, Ўзбекистон Латвияга пахта толаси, мева-сабзавотлар, нефть маҳсулотлари, минерал ўғитлар, рангли металл ва бошқа товарлар экспорт қилади. Латвия Ўзбекистонга ускуналар, транспорт воситалари, денгиз маҳсулотлари, пластмасса етказиб беради, логистика хизмати кўрсатади. Ўзбекистонда Латвия сармояси иштирокида тузилган 32 қўшма корхона фаолият кўрсатмоқда, Латвиянинг 16 компанияси Ўзбекистонда ўз ваколатхонасини очган.
Изоҳ (0)