“Tojikiston temir yo‘llari” korxonasi va “O‘zbekiston temir yo‘llari” kompaniyasi temiryo‘l orqali amalga oshiriladigan yuk tashish uchun ikki tomonlama chegirmalar taqdim etish borasida kelishuvga erishdi. Bu haqda, Tojikistonning “Xovar” agentligiga asoslanib, “Norma.uz” xabar bermoqda.
Tojikiston Transport vazirligidan ma’lum qilishlaricha, “O‘zbekiston temir yo‘llari” aksiyadorlik jamiyati neft mahsulotlari, alyuminiy va alyuminiy qirindisini “Quduqli — Keles” va “Quduqli — Qoraqalpoq” temiryo‘li bo‘ylab tashish uchun (imtiyozli 0,85 koeffitsiyentni qo‘llab) chegirmalar taqdim etish haqida telegramma yo‘llagan. Muzokaralar davomida “Boldir — Quduqli” temiryo‘l qismidagi koeffitsiyent (1,83) ham 2015-yil 31-dekabrga qadar bekor qilingan.
O‘z navbatida, “Tojikiston temir yo‘llari” davlat unitar korxonasi Tojikiston tranzit hududlari (Istiqlol va Spitamen)dagi temiryo‘l orqali olib o‘tilayotgan O‘zbekiston yuklarini tashish uchun (imtiyozli 0,7 va 0,85 koeffitsiyetlarni qo‘llab) chegirmalar joriy etilishi ta’minlanishi masalasida O‘zbekiston tomoniga telegramma yo‘llagan.
“Xovar” agentligi xabarida qayd etilishicha, chegirmalarning joriy etilishi ikki qo‘shni mamlakat — Tojikiston va O‘zbekiston o‘rtasida yuk tashishning rivojlanishiga ko‘mak beradi.
Izoh (0)