Xitoy Oliy xalq sudi qimmatbaho metallarni qayta eritish bilan shug‘ullanuvchi Qiankun davlat kompaniyasining sobiq rahbariga nisbatan chiqarilgan o‘lim jazosini bekor qildi. Sudyalar Sun Vendayga qo‘yilgan ayblarni yetarli darajada asoslanmagan, deb topdi va qayta ko‘rib chiqishga yubordi. Bu haqda The South China Morning Post ma’lum qildi.
Sun Venday 2011-yilda poraxo‘rlik va 85 million yuan (salkam 13,5 million dollar)ni talon-taroj qilishda ayblanib, oliy jazoga hukm qilingandi. Tintuv chog‘ida uning uyidan 2,7 million yuan (425 ming dollar) naqd pul, 134 kilogramm oltin, salkam bir tonna kumush va 81 gramm platina topilgan. Bu topilmalar uning 4 ta uyi va 4 ta avtomobili bilan birga musodara etilgandi.
2013-yili Sun Venday hukm yuzasidan shikoyat bergan, biroq Ichki Mongoliya oliy sudi (jinoyat Xitoyning ushbu hududida sodir etilgan) hukmni o‘zgarishsiz qoldirgandi.
Izoh (0)