Хитой Олий халқ суди қимматбаҳо металларни қайта эритиш билан шуғулланувчи Qiankun давлат компаниясининг собиқ раҳбарига нисбатан чиқарилган ўлим жазосини бекор қилди. Судьялар Сун Вэньдайга қўйилган айбларни етарли даражада асосланмаган, деб топди ва қайта кўриб чиқишга юборди. Бу ҳақда The South China Morning Post маълум қилди.
Сун Вэньдай 2011 йилда порахўрлик ва 85 миллион юан (салкам 13,5 миллион доллар)ни талон-тарож қилишда айбланиб, олий жазога ҳукм қилинганди. Тинтув чоғида унинг уйидан 2,7 миллион юань (425 минг доллар) нақд пул, 134 килограмм олтин, салкам бир тонна кумуш ва 81 грамм платина топилган. Бу топилмалар унинг 4 та уйи ва 4 та автомобили билан бирга мусодара этилганди.
2013 йили Сун Вэньдай ҳукм юзасидан шикоят берган, бироқ Ички Монголия олий суди (жиноят Хитойнинг ушбу ҳудудида содир этилган) ҳукмни ўзгаришсиз қолдирганди.
Изоҳ (0)