Buxarestdagi tungi klubda ro‘y bergan yong‘in qurbonlari soni 46 kishiga yetdi. Oldinroq halok bo‘lganlar 44 kishi ekanligi bildirilgandi. Bu haqda “RIA Novosti” xabar bermoqda.
8-noyabr, yakshanba kuni fojia sodir bo‘lgan chog‘da klubda chiqish qilgan guruh zarbchisi Bogdan Enake kasalxonada vafot etdi. Uni davolash uchun Shveysariyaga samolyotda jo‘natilayotganda Enakening holati og‘irlashgan va samolyot ortiga qaytib, Ruminiyaga qo‘ngan. 9-noyabr, dushanba kuni Tel-Aviv kasalxonasida fotosuratchi va jurnalist Teodora Maftey hayotdan ko‘z yumdi.
Eslatib o‘tamiz, Niderlandiya, Norvegiya, Avstriya, Belgiya, Germaniya, Buyuk Britaniya va Isroil kabi mamlakatlar jabrlanganlarni kasalxonalarida joylashtirishga rozi bo‘lgan. Ayni paytda Buxarest kasalxonalarida 83 kishi qolmoqda, ulardan 21 kishining holati og‘ir ekanligi aytilmoqda.
Izoh (0)