Россия Twitter’ида #ЯНеШарли («Мен Шарли эмасман») ҳэштеги топга чиқди

Франциянинг Charlie Hebdo газетасида Россиянинг A321 лайнери ҳалокати мавзусида карикатуралар чоп этилгач, Россия Twitter’ида #ЯНеШарли («Мен Шарли эмасман») ҳэштеги топга чиқди, дея хабар бермоқда «РИА Новости».

Интернет фойдаланувчилари Charlie Hebdo’нинг хатти-ҳаракатларига нисбатан қатъий норозилик билдирмоқда.

Кремлдагилар эса карикатураларнинг чоп қилинишини «таҳқирлаш» деб атади. «Бунинг на демократияга, на ўз фикрини эркин ифода қилишга, ҳеч нарсага боғлиқлиги йўқ — бу таҳқирлаш», — дея таъкидлади Россия президенти матбуот котиби Дмитрий Песков.

Аввалроқ Россия Ташқи ишлар вазирлиги расмий вакили Мария Захарова Франциянинг Charlie Hebdo сатирик газетасида Россиянинг «Когалимавиа» компаниясига тегишли A321 йўловчи самолётининг Мисрдаги ҳалокати ҳақидаги карикатура пайдо бўлишини изоҳлаб: «Яна ким Шарли?» — деб ёзган эди Facebook’даги саҳифасида.

Эслатиб ўтамиз, Россиянинг «Когалимавиа» компаниясига тегишли A321 йўловчи самолётининг Мисрдаги ҳалокати француз сатирик газетаси Charlie Hebdo карикатурасига мавзу сифатида хизмат қилди. Ўзининг провокацион мақолалари билан танилган нашрнинг янги сонида 224 кишини ҳаётдан олиб кетган фожиа мавзуси бирданига икки суратда акс эттирилган.