O‘zbekistonlik 4 nafar eshkakchi Rio—2016 o‘yinlariga yo‘llanma oldi

Indoneziyaning Palembang shahrida baydarka va kanoeda eshkak eshish bo‘yicha Osiyo chempionati bahslari o‘tkazilmoqda, deb xabar qiladi O‘zbekiston Milliy olimpiya qo‘mitasi matbuot xizmati.

Qit’aning yetakchi eshkak eshuvchilari ishtirokida o‘tayotgan mazkur nufuzli musobaqada birinchi o‘rinni egallaganlar, Osiyo chempionatining oltin medallari bilan birga, 2016-yili Rio-de-Janeyro shahri (Braziliya)da o‘tkaziladigan XXXI yozgi Olimpiada o‘yinlarining yo‘llanmalarini ham qo‘lga kiritadi.

Qit’a chempionatida g‘oliblikka erishgan sportchilar safidan to‘rt nafar O‘zbekistonlik eshkakchi ham o‘rin egalladi. Jumladan, yakkalik qayiqda 1000 metr masofaga baydarkada eshkak eshish musobaqasida Aleksey Mochalov va 1000 metr masofaga kanoeda eshkak eshish musobaqasida Gerasim Kochnev marra chizig‘iga birinchi bo‘lib yetib keldi va Rio—2016 o‘yinlarining yo‘llanmalari uchun belgilangan me’yorni bajardi.

Bundan tashqari, ikki kishilik qayiqda 1000 metr masofaga kanoeda eshkak eshish musobaqasida Vadim Menkov va Serik Mirbekov ham Osiyo chempionatining oltin medallari va XXXI yozgi Olimpiada o‘yinlarining yo‘llanmasi uchun belgilangan me’yorni bajardi.