Индонезиянинг Палембанг шаҳрида байдарка ва каноэда эшкак эшиш бўйича Осиё чемпионати баҳслари ўтказилмоқда, деб хабар қилади Ўзбекистон Миллий олимпия қўмитаси матбуот хизмати.
Қитъанинг етакчи эшкак эшувчилари иштирокида ўтаётган мазкур нуфузли мусобақада биринчи ўринни эгаллаганлар, Осиё чемпионатининг олтин медаллари билан бирга, 2016 йили Рио-де-Жанейро шаҳри (Бразилия)да ўтказиладиган XXXI ёзги Олимпиада ўйинларининг йўлланмаларини ҳам қўлга киритади.
Қитъа чемпионатида ғолибликка эришган спортчилар сафидан тўрт нафар Ўзбекистонлик эшкакчи ҳам ўрин эгаллади. Жумладан, яккалик қайиқда 1000 метр масофага байдаркада эшкак эшиш мусобақасида Алексей Мочалов ва 1000 метр масофага каноэда эшкак эшиш мусобақасида Герасим Кочнев марра чизиғига биринчи бўлиб етиб келди ва Рио—2016 ўйинларининг йўлланмалари учун белгиланган меъёрни бажарди.
Бундан ташқари, икки кишилик қайиқда 1000 метр масофага каноэда эшкак эшиш мусобақасида Вадим Меньков ва Серик Мирбеков ҳам Осиё чемпионатининг олтин медаллари ва XXXI ёзги Олимпиада ўйинларининг йўлланмаси учун белгиланган меъёрни бажарди.
Изоҳ (0)