Халқаро футбол федерацияси (ФИФА) ташкилот президентлиги сайловларида иштирок этиш учун етти нафар номзоднинг аризаларини маъқуллади. Бу ҳақда Meduza хабар бермоқда.
ФИФА матбуот хизматининг хабар беришича, Иордания шаҳзодаси Али бин ал-Ҳусайн, Муса Ҳасан Билити, Жером Шампань, Жанни Инфантино, Мишель Платини, шайх Салмон бин Иброҳим ал-Халифа ва Токио Сексвале сайловда номзод сифатида қатнашиш ҳуқуқини қўлга киритди.
Reuters агентлигининг қайд этишича, УЕФА раҳбари Мишель Платинига нисбатан жорий этилган 90 кунлик дисквалификация муддати якунига етмагунча, сайлов комиссияси унинг аризасини кўриб чиқмайди.
ФИФА президентлиги учун муддатидан аввалги сайловлар 2016 йил февралида бўлиб ўтиши керак. Федерацияга 1998 йилдан бери раҳбарлик қилиб келаётган Йозеф Блаттер коррупциявий можаро ортидан истеъфога чиқишга рози бўлганидан сўнг, сайловлар ўтказилиши эълон қилинганди.
2015 йилнинг май ойида АҚШ сўрови билан Швейцарияда ФИФАнинг юқори мартабали ходимлари, хусусан, вице-президенти ҳибсга олинди. Футбол амалдорлари коррупцияга алоқадорликда гумон қилинмоқда.
2015 йилнинг сентябрида Швейцария ҳуқуқни муҳофаза қилиш органлари Блаттер масъулиятсизлик ва мулкни ноқонуний йўл билан ўзлаштиришда гумон қилинаётганини маълум қилди. Тергов маълумотларига кўра, Блаттер телетрансляция ҳуқуқларини сотиш бўйича қасддан ФИФА учун фойдасиз бўлган шартномани имзолаган, шунингдек, УЕФА раҳбари Мишель Платинининг ҳисоб рақамига ноқонуний равишда икки миллион франк пул ўтказган. Блаттер мазкур айбловларни рад этмоқда. Платини пул ўтказмаси ҳолати бўлганини тан олиб, бу пуллар фақат ФИФА билан шартнома асосида ишлаб топилган маблағ эканлигини таъкидламоқда. Октябрь ойи бошида ФИФА Тартиб-интизом қўмитаси Платини ва Блаттерни 90 кунга футболдан четлатди.
Платини ФИФА президенти лавозимида Блаттернинг вориси бўлишга асосий номзод, деб ҳисобланмоқда.
Изоҳ (0)