Kecha, 25-oktabr kuni Olmaota shahrida taekvondoning WTF yo‘nalishi bo‘yicha Qozog‘iston Ochiq chempionati boshlandi. Musobaqaning dastlabki kuni ham yoshlar, ham kattalar o‘rtasidagi bahslar bo‘lib o‘tdi. O‘zbekistonlik sportchilar shu kuni beshta medalga sazovor bo‘ldi, deb xabar beradi “Olamsport”.
Kattalar o‘rtasidagi -54 kg vazn toifasida dayanga chiqqan Bahrom Abdullayev kumush, -58 kg vazn toifasidagi Timurbek O‘rolov esa bronza medalini qo‘lga kiritdi.
Yoshlar o‘rtasidagi musobaqada esa O‘zbekiston terma jamoasi a’zolari uchta medalga ega bo‘ldi. -59kg vazn toifasidagi Pan Vlada barcha raqiblarini mag‘lubiyatga uchratib, shohsupaning eng yuqori pog‘onasiga ko‘tarildi. -63kg vazndagi Ulug‘bek To‘xtasinov kumush, -59kg vazndagi Sardor Toirov bronza medali bilan taqdirlandi.
Olimpiada yo‘llanmasi uchun kurash olib borayotgan O‘zbekiston terma jamoasining ikki yetakchi a’zolari jahon chempioni Dmitriy Shokin hamda jahon vitse-chempioni Jasur Boyqo‘ziyev musobaqadagi ishtirokini 28-oktabr kuni boshlaydi. Ushbu turnir g‘olibga Rio—2016 Olimpiadasi uchun muhim bo‘lgan 10 reyting ochkosini berishi bilan ahamiyatlidir.
Izoh (0)