O‘zbekiston Tashqi iqtisodiy aloqalar, investitsiyalar va savdo vazirligida 24-oktabr kuni Yaponiya tashqi savdoni rivojlantirish tashkiloti — JETRO raisi Xiroyuki Ishige bilan muzokaralar bo‘lib o‘tdi. Bu haqda UzDaily xabar bermoqda.
Uchrashuv chog‘ida ikki mamlakat o‘rtasidagi o‘zaro manfaatli savdo-iqtisodiy, investitsiyaviy va innovatsion-texnologik hamkorlikni yanada kengaytirish masalalari muhokama qilindi.
Xiroyuki Ishige yapon biznesining o‘zbekistonlik hamkorlar bilan uzoq muddatli aloqalarni rivojlantirishga bo‘lgan qiziqishi o‘sib borayotganini alohida qayd etib o‘tdi.
JETRO rahbari so‘zining isboti sifatida, Yaponiya bosh vaziri Sindzo Abening O‘zbekistonga tashrifi doirasida 25-oktabr kuni bo‘lib o‘tadigan qo‘shma biznes-forumda qatnashish uchun Yaponiya korporatsiya va kompaniyalari (Mitsubishi, Mitsui, Isuzu, Itochu, Jogmec, Marubeni, Shimizu, Sumitomo, Sojitz, Toyota Tsusho va boshqalar)ning 200 dan ortiq rahbari va vakillari Toshkentga kelganini ma’lum qildi.
Uchrashuv yakunlari bo‘yicha Yaponiyaning ilg‘or tajribasi va kompaniyalarining zamonaviy texnologik yechimlarini jalb etgan holda O‘zbekiston iqtisodiyotining turli tarmoqlarida istiqbolli hamkorlik loyihalarini yuritish bo‘yicha faol munosabatlarni davom ettirishga kelishib olindi.
Izoh (0)