Yaponiya bosh vaziri Sindzo Abe 24-oktabr, shanba kuni O‘zbekistonda rasmiy tashrif bilan bo‘ladi. U “Jahon” axborot agentligiga bergan intervyusida mazkur tashrifning ikki mamlakat o‘rtasidagi aloqalarni mustahkamlashdagi ahamiyatiga alohida e’tibor qaratdi, deya xabar beradi “Gazeta.uz”.
“Oradan to‘qqiz yil o‘tib Yaponiya bosh vazirining O‘zbekistonga rasmiy tashrifi amalga oshishidan benihoyat mamnunman. Prezident Islom Karimov bilan uchrashuvimiz chog‘ida siyosat, iqtisodiyot va madaniyatga oid keng ko‘lamdagi masalalarni batafsil muhokama etish niyatidaman”, — deya ta’kidlagan Sindzo Abe.
Bosh vazir O‘zbekiston Markaziy Osiyo mintaqasi taraqqiyoti va barqarorligida muhim o‘rin tutadigan yirik davlat ekanligiga urg‘u berdi. “Buni inobatga olib, O‘zbekiston bilan nafaqat ikki tomonlama munosabatlarni mustahkamlash, balki mintaqa uchun umumiy bo‘lgan transport, logistika, suv ta’minoti, elektr energiyasi, narkosavdoga qarshi kurash hamda davlat chegaralarini qo‘riqlash masalalarini hal etish borasida hamkorlikni davom ettirishni maqsad qilganmiz”, — deydi Sindzo Abe.
Savdo va iqtisodiy sohadagi aloqalarga kelganda, bosh vazir yapon kompaniyalari O‘zbekiston sanoatini diversifikatsiya qilishga salmoqli hissa qo‘shayotgan avtobuslar va yuk transporti ishlab chiqarish, kimyoviy o‘g‘itlar zavodi qurilishi, axborot texnologiyalarini rivojlantirish kabi qator loyihalarda ishtirok etayotganini bildirdi. Shu bilan birga, O‘zbekistonning ulkan salohiyatini hisobga olgan holda, “ikki davlat o‘rtasida savdo-iqtisodiy munosabatlarni rivojlantirish uchun katta imkoniyatlar borligi”ni qayd etdi.
Yaponiya bosh vaziriga tashrif davomida yapon iqtisodiyoti vakillaridan iborat katta delegatsiya hamrohlik qiladi. “Delegatsiyaning kelishi O‘zbekistonga yapon kompaniyalari kirib borishi, faoliyatini oldinga siljishiga ko‘mak beradi. Yapon texnologiyalari va tajribasi esa O‘zbekiston taraqqiyotida muayyan darajada qo‘l kelishiga umid qilaman”, — deya ta’kidlagan bosh vazir.
Izoh (0)