MDH davlat rahbarlari xalqaro terrorizmga qarshi kurash bo‘yicha qo‘shma bayonot qabul qiladi

Qozog‘istonning Burabay shaharchasida MDH Davlat rahbarlari kengashining tor tarkibdagi majlisi bo‘lib o‘tdi, deya xabar bermoqda Kazakhstan Today.

Qozog‘iston prezidenti Nursulton Nazarboyev tadbir ishtirokchilari: Ozarbayjon, Armaniston, Belarus, Qirg‘iziston, Rossiya, Tojikiston, O‘zbekiston prezidentlari, shuningdek, Moldova bosh vaziri va Turkmaniston Vazirlar mahkamasi raisi o‘rinbosari bilan salomlashdi.

Nazarboyev mazkur tadbir MDH rivojiga o‘z hissasini qo‘shishiga ishonch bildirdi. U 17 ta masalani qamrab olgan majlis kun tartibining mazmunga boy ekanligini ta’kidladi.

“Masalalarning katta qismi xavfsizlik va huquqiy tartibga bag‘ishlangan. Xalqaro shartnomalar paketini imzolash, dasturiy hujjatlarni tasdiqlash, shuningdek, MDH davlatlari rahbarlarining xalqaro terrorizmga qarshi kurash bo‘yicha va BMT tashkil topganiga 70 yil to‘lishi munosabati bilan bayonot qabul qilishi rejalashtirilgan”, — dedi Qozog‘iston prezidenti.

Avvalroq Islom Karimov MDH Davlat rahbarlari kengashi majlisida ishtirok etish uchun Qozog‘istonga jo‘nab ketgani xabar berilgan edi.

Davlat rahbarlarining navbatdagi uchrashuvida MDH doirasidagi hamkorlikni yanada rivojlantirish masalalarini muhokama qilish, xalqaro va mintaqaviy miqyosdagi dolzarb muammolar yuzasidan fikr almashish rejalashtirilgan.