Madridning “Real” klubi hujumchisi Krishtianu Ronaldu “Manchester Yunayted”da Ueyn Runi bilan bir jamoada to‘p surishni yoqtirganini aytib o‘tdi. Bu futbolchilar 2004-yildan to 2009-yilga qadar birgalikda “MYu” sharafini himoya qilgan edi, deb xabar beradi “Uff.uz”.
“Runini sog‘inaman. Umid qilamanki u bilan yana bir jamoa safida maydonga tushamiz. Uni ‘MYu’da har doim yaxshi ko‘rishgan. Unda g‘oliblik ruhiyati bor va u hech qachon to‘xtab qolmaydi. O‘zi gol urishi ham yoki jamoa uchun o‘ynashi ham mumkin.
JCh—2006 musobaqasidagi kelishmovchilikka kelsak, men hech narsadan afsusda emasman. Terma jamoa safida o‘ynar ekansan, o‘z mamlakating sharafini himoya qilishing lozim. Shundan so‘ng biz Runi bilan gaplashib olganmiz va u mening fikrimga qo‘shilgan. Biz hamon do‘stlarmiz. Ba’zi insonlar esa yo‘q joydan janjal o‘ylab topishga urinadi”, — deydi Ronaldu.
Eslatib o‘tamiz, 2006-yilgi jahon chempionati vaqtida Angliya va Portugaliya terma jamoalari to‘qnashuvida Runi yerda yotgan Rikardu Karvalyoni bosib o‘tgan va Ronaldu buni hakamga aytib bergan edi. Natijada hakam Runini maydondan chetlatgan, Angliya terma jamoasi esa penaltilar seriyasida mag‘lubiyatga uchragan edi.
Izoh (0)