Facebook’dagi “Potrebitel.uz” guruhi a’zolaridan biri har bayram arafasida o‘z pensiya jamg‘armasini kam ta’minlanganlarga ko‘mak berish yo‘lida sarflaydigan 80 yoshli onasi haqida hikoya qildi.
“Onam 80 yoshda, u hoji ona, Allohga shukr, hamma narsasi yetarli va hech narsaga ehtiyojmand emas, lekin hech qachon kam ta’minlangan kishilarni, yolg‘iz insonlarni esdan chiqarmaydi. Har bayramda u o‘z pensiya jamg‘armasini, mahalladagi kam ta’minlanganlar uchun oziq-ovqat mahsulotlarini sotib olishni so‘rab, mahalla qo‘mitasi raisiga topshiradi.
Yaqinda onam bir voqeani eshitib qoldi: bir qiz onasining o‘limidan so‘ng tushkunlikka tushib qolib, yurish qobiliyatini yo‘qotgan va 10 yildan ziyod vaqtdan beri birovning yordamisiz harakatlana olmas ekan. Bu voqea onamga juda ta’sir qildi va u bu qiz uchun nogironlar aravachasi sotib olishga qaror qildi. Kecha, Hayit arafasida biz onamning pensiyasiga sotib olingan bu sovg‘ani mahalla qo‘mitasiga olib bordik, biroq rais sovg‘ani shaxsan onam topshirishlari shart deb turib oldi va biz shunday qildik.
Imkoniyatingiz darajasida yaxshilik qiling va sizga ham yaxshilik keladi. Bayram muborak bo‘lsin!”, — deb yozadi Facebook foydalanuvchisi.
Izoh (0)