Хитой президенти Си Цзиньпин мамлакат иқтисодиётига киритиладиган хорижий инвестицияларга нисбатан баъзи чекловларни бекор қилиш борасида режалар борлигини тасдиқлади. «ТАСС» хабарига кўра, Сзинпин бу ҳақда АҚШнинг Сиэтл шаҳрида Америка ва Хитойнинг 30 га яқин компанияси бошлиқлари, хусусан, Apple раҳбари Тим Кук ва Berkshire Hathaway эгаси Уорен Баффет билан учрашув вақтида айтиб ўтди.
«Биз очиқликка асосланган янги иқтисодий тизимни қуриш, хорижий инвестициялар соҳасида янги ислоҳотлар (қоидалар)ни ишга тушириш ва чет эл инвестицияларига нисбатан чекловларни кескин камайтириш устида ишлаяпмиз», — дея қайд этди Си Цзиньпин. Бу каби юмшатишлар дастлаб АҚШнинг икки автогиганти — General Motors ва Ford’га таъсир қилади. «GM ва Ford Хитойдаги инвестициялари ҳажмини ошириши мумкин», — деди Хитой давлат раҳбари.
Маълумот учун, Хитой раиси Си Цзиньпин АҚШга ташрифини мамлакатнинг ғарбий соҳилидан бошлади. У Америка бизнеси етакчилари билан учрашиб, Сиэтлда Америка—Хитой муносабатлари бўйича миллий қўмита ва Америка—Хитой ишбилармон кенгаши томонидан ташкил этилган тантанали қабулда дастурий маъруза билан чиқиш қилди.
24 сентябрь куни Сзинпин АҚШ ғарбидаги сафарини якунлаб, Вашингтонга йўл олади. Ташрифнинг ишчи қисми 25 сентябрь, жума кунига белгиланган бўлиб, унинг доирасида Оқ уйда учрашув маросими, музокаралар ва АҚШ президенти Барак Обама билан бирга матбуот анжумани бўлиб ўтади.
Изоҳ (0)