AQSh prezidenti o‘rni uchun da’vogar Jeb Bush o‘z vaqtida nasha iste’mol qilganini tan oldi. Bu haqda The Hill xabar bermoqda.
Kaliforniyadagi debatlar vaqtida Respublikachilar partiyasidan nomzod bo‘lishga da’vogar 62 yoshli Bush shunday dedi: “Ha, 40 yil avval men nasha chekkanman, buni tan olaman. Ishonchim komil, bu ishni qilgan yagona inson emasman, biroq kamdan-kam odam 25 million kishilik auditoriya oldida bunday iqror bilan huzur topsa kerak. Onamga bu so‘zlarim yoqmasligi aniq”.
Keyinroq Bush Twitter’dagi akkauntida onasidan qisqa qilib uzr so‘radi.
Sorry Mom
— Jeb Bush (@JebBush) September 17, 2015
Jeb Bush nasha chekkanini tan olgan AQShdagi ilk yuqori martabali siyosiy arbob emas. Masalan, 1992-yili Bill Klinton prezidentlikka kirishishidan avval “nasha chekkanini, lekin unga o‘tirib qolmagani”ni aytib o‘tgandi. 2005-yili esa Jebning akasi, AQShning o‘sha vaqtdagi prezidenti kichik Jorj Bush giyohvand modda iste’mol qilib ko‘rganini bilvosita tan olgandi.
2003-yili esa AQSh Davlat departamentining amaldagi rahbari Jon Kerri nasha chekish tajribasi bilan o‘rtoqlashgan bo‘lsa, AQShning amaldagi prezidenti Barak Obama nashani qanday iste’mol qilgani haqida jurnalistlarga bir necha bor gapirib bergan, xususan, u “Nasha chekish ixlosmandlari to‘dasi”ga a’zo ham bo‘lgan.
Izoh (0)