АҚШ президенти ўрни учун даъвогар Жеб Буш ўз вақтида наша истеъмол қилганини тан олди. Бу ҳақда The Hill хабар бермоқда.
Калифорниядаги дебатлар вақтида Республикачилар партиясидан номзод бўлишга даъвогар 62 ёшли Буш шундай деди: «Ҳа, 40 йил аввал мен наша чекканман, буни тан оламан. Ишончим комил, бу ишни қилган ягона инсон эмасман, бироқ камдан-кам одам 25 миллион кишилик аудитория олдида бундай иқрор билан ҳузур топса керак. Онамга бу сўзларим ёқмаслиги аниқ».
Кейинроқ Буш Twitter’даги аккаунтида онасидан қисқа қилиб узр сўради.
Sorry Mom
— Jeb Bush (@JebBush) September 17, 2015
Жеб Буш наша чекканини тан олган АҚШдаги илк юқори мартабали сиёсий арбоб эмас. Масалан, 1992 йили Билл Клинтон президентликка киришишидан аввал «наша чекканини, лекин унга ўтириб қолмагани»ни айтиб ўтганди. 2005 йили эса Жебнинг акаси, АҚШнинг ўша вақтдаги президенти кичик Жорж Буш гиёҳванд модда истеъмол қилиб кўрганини билвосита тан олганди.
2003 йили эса АҚШ Давлат департаментининг амалдаги раҳбари Жон Керри наша чекиш тажрибаси билан ўртоқлашган бўлса, АҚШнинг амалдаги президенти Барак Обама нашани қандай истеъмол қилгани ҳақида журналистларга бир неча бор гапириб берган, хусусан, у «Наша чекиш ихлосмандлари тўдаси»га аъзо ҳам бўлган.
Изоҳ (0)