Xitoyning Yanchjou shahrida istiqomat qiluvchi fuqaro iPhone 6s sotib olish maqsadida buyragini sotishga qaror qildi. China Daily xabariga ko‘ra, familiyasi U (Wu) bo‘lgan yigitga bu g‘oyani uning do‘sti Xuang (Huang) taklif qilgan.
O‘smirlar internetda organlar savdosi bilan noqonuniy ravishda shug‘ullanuvchi agentni topgan. Smartfon olish niyatida bo‘lgan U Nankin shahridagi kasalxonada tibbiy ko‘rikdan o‘tishi, u yerda U va Xuang agent bilan uchrashishi kerak edi, biroq agent uchrashuvga kelmagan.
Shundan so‘ng U o‘z buyragini sotish fikridan qaytib qolgan va bu haqda do‘sti Xuangga aytgan. Biroq Xuang savdoni bekor qilishdan bosh tortgan, oxir-oqibat U politsiyaga murojaat qilishga majbur bo‘lgan. Huquqni muhofaza qilish organlari hozircha yashirinib olgan Xuangni qo‘lga tushira olganicha yo‘q.
2013-yilning oktabrida Shanxayda istiqomat qiluvchi yosh oila qizini sotib, puliga iPhone sotib olgani ma’lum bo‘lgandi. O‘shanda ishsiz er-xotin tug‘uruqqa yaqin qolganida internetda bolaning sotilishi haqida e’lon bergan.
Izoh (0)